0
0
काठमाण्डौ, २९ जेठ विदेश पठाइदिने भन्दै तीन सय जनाभन्दा बढी व्यक्तिसँग झन्डै १५ करोड रुपैयाँ ठगी गर्ने चार जनालाई प्रहरीले पक्राउ गरेको छ । काठमाण्डौ उपत्यका अपराध अनुसन्धान कार्यालयले आज पत्रकार सम्मेलन गर्दै उनीहरूलाई सार्वजनिक गरेको छ ।
पक्राउ पर्नेमा चितवनको भरतपुर महानगरपालिकाका २८ वर्षीय राजकुमार भट्ट, कास्कीको माछापुच्छ्रे गाउँपालिकाका २२ वर्षीय नवीन विक, कास्कीकै पोखरा महानगरपालिकाका २३ वर्षीय पवन पन्त र सोलुखुम्बुका ४६ वर्षीय नारायणकुमार खड्का रहेका कार्यालयका प्रहरी वरिष्ठ उपरीक्षक (एसएसपी) सानुराम भट्टराईले जानकारी दिनुभएको छ ।
उनीहरूले अमेरिका, कम्बोडिया, न्युजिल्यान्ड, फ्रान्सलगायतका देशहरूमा वैदेशिक रोजगारीमा पठाइदिने भन्दै विगत तीन/चार वर्षयता तीन सय जनाभन्दा बढी व्यक्तिसँग ५ देखि १० लाखका दरले १५ करोड रुपैयाँभन्दा बढी ठगी गरेको एसएसपी भट्टराईले बताउनुभयो । उनीहरूले फेसबुक म्यासेन्जर, ह्वाट्सएप लगायतका सामाजिक सञ्जालमा नक्कली खाता खोजेर वैदेशिक रोजगारीका लागि विभिन्न देशमा पठाइदिने भनेर विज्ञापन गर्दै ठगी गर्ने गरेका थिए ।।
