दाङमा केराखेती गर्ने किसानको सङ्ख्या बढ्दै
दाङ ३१ भदौ । पछिल्लो समय दाङमा केराखेती गर्ने किसानको सङ्ख्या बढ्दै गएको छ । देउखुरी क्षेत्रमा केराखेतीका लागि माटोसँगै सिँचाइको सुविधा भएको र थोरै खेतीबाट राम्रो आम्दानी लिन सकिने भएकाले व्यावसायिक रूपमा केरा खेती गर्नेको सङ्ख्या बढ्दै गएको हो । राप्ती गाउँपालिका–७ सिसहनिया निवासी विद्याबहादुर चौधरीले विगत चार वर्षदेखि केराखेती गर्दै आउनुभएको छ ।
तीन बिघा जग्गा भाडामा लिएर व्यावसायिक केराखेतीमा लाग्नुभएका उहाँले वार्षिक १३ देखि १४ लाख रुपैयाँ बराबरको केरा बिक्री गर्दै आएको बताउनुभयो । यो उत्पादनले अन्य समयमा बजारको झन्डै ६० प्रतिशत माग धान्ने गरे पनि चाडपर्वमा भने बाहिरी जिल्लाकै भर पर्नुपर्ने अवस्था रहेको छ । कृषि ज्ञान केन्द्रका कृषि अर्थ विज्ञ पृथ्वीराज लामिछानेका अनुसार दाङमा ६ सय ७० हेक्टर जमिनमा व्यावसायिक रूपमा केरा खेती हुने गरेको छ । त्यसमध्ये पाँच सय ३० हेक्टरमा रोपेको केराले वार्षिक चार हजार पाँच सय ३५ मेट्रिक टन उत्पादन दिने गरेको छ ।।
